Саха сирин урбаанньыттара – көхтөөх уһун үйэлэнии иһин

Көрсүһүүгэ эрэгийиэн сайдыытыгар уонна дьон олоҕун таһымын үрдэтиигэ биллэр кылааттарын киллэрсэр саха биисинэһин саамай чаҕылхай бэрэстэбиитэллэрин бэлиэтээтилэр. Ордук болҕомтону социальнай хайысхалаах бырайыактарга уурдулар. Ол иһигэр “Аврора” мэдиссиинэ килииньикэтин Көхтөөх уһун үйэлэнии киинин. Бу бырайыак аҕам саастаахтарга ураты болҕомтону ууруу символынан уонна биисинэс уопсастыбаны кытары көдьүүстээхтик алтыһыытын холобурунан буолла.

Уопсастыбаннай палаата бэрэссэдээтэлэ Станислав Иванов махтал суругун “Аврора” килииньикэ дириэктэригэр Николай Христофоровка, Көхтөөх уһун үйэлэнии киинин сэбиэдиссэйигэр Вероника Макароваҕа, итиэннэ бырайыак бастайааннай партнёругар – “Кыым” хаһыат шеф-эрэдээктэригэр Владимир Степановка туттартаата.

Николай Христофоров Киин ситиһиилэрин уонна былааннарын кэпсээтэ, итиэннэ бэс ыйын 26 күнүгэр Дьокуускайга буолаары турар пуоруму сиһилии билиһиннэрдэ. Кини судаарыстыба өттүттэн маннык бырайыактары олоххо киллэрэргэ өйөбүл баара улахан суолталааҕын бэлиэтээтэ уонна бырабыыталыстыба бэрэссэдээтэлин солбуйааччытыгар Анатолий Аскалоновичка махтанна.

Бу көрсүһүү былаас, биисинэс уонна уопсастыба кыттыһаннар Саха сирин олоҕун уйгутун улаатыннарарга, дьон олоҕун хаачыстыбалаахтык тупсарарга төһүү буоларын өссө төгүл итэҕэттэ.